Опубликовано:
Olimpiya tariximizdə yeni parlaq səhifə açmağı planlaşdıran akademik avarçəkənimiz Aleksandr Aleksandrov final mərhələsinə yüksəlib. Apasport.az saytının məlumatına görə, kişilər arasında 1 nəfərlik qayıqla (M1X) çıxış edən idmançımız bu gün London Olimpiadasının yarımfinal mərhələsində gücünü yoxlayıb.
2000 m məsafəyə yürüşdə 22 yaşlı Aleksandrovun rəqibləri Lianq Janq (Çin), Santiaqo Fernandez (Argentina), Ondrej Sinek (Çexiya), Alan Kempbell (Böyük Britaniya) və Tim Maeyens (Belçika) olub. 6-cı yürüş zolağında mübarizə aparan idmançımız start xəttinə saat 15:30-da çıxıb.
O, bundan əvvəlki mərhələlərdə olduğu kimi yenə lazımı nəticə qazanmağı bacarıb. Finala yüksəlmək üçün ilk “3-lük”də qərarlaşmaq lazım idi ki, Aleksandr da 3-cü olub (7:20.80). Təmsilçimizi rəqiblərindən Sinek (7:16.58) və Kempbell (7:18.92) qabaqlayıb.
Qeyd edək ki, final mərhələsi avqustun 3-də keçiriləcək.
(c) Apasport
